कविता कुसुम kavitakusum

उपन्यासकार देश सुब्बाद्वारा लिखित ‘आदिवासी’ उपन्यासको विमोचन

2007-12-14T06:39:00.000-08:00

हङकङ २००७ डिसेम्वर १२ तारीख साँझ जोर्डनस्थित कँगन रेष्टुरेन्टमा आयोजित एक समारोहबीच उपन्यासकार देश सुब्बाद्वारा लिखित ‘आदिवासी’ शीर्षकको उपन्यासको औपचारिक विमोचन भएको छ ।

भयवादमा आधारित भनिएको उक्त ‘आदिवासी’ उपन्यासका पाण्डुलीपी यहाँ विभिन्न व्यक्तिहरुलाई पहिले नै वितरण गरिएको हुँदा विमोचनकै समय त्यस कृतिको बारेमा छलफल तथा विचार विमर्शका कार्यक्रमहरु पनि साथै भएका थिए । पाण्डुलीपी नहेर्ने उपस्थित व्यक्तिहरु त्यस कृति ‘आदिवासी’ उपन्यासका बारेमा गरिएका टिप्पणीहरु अति नै पट्यार-लाग्दो लाग्दै गरेको बताएका थिए । सिर्जनशील साहित्य समाज हङकङको आयोजनामा सम्पन्न भएको यस विमोचन तथा छलफल कार्यक्रमको सँचालन समाजका सदस्य देवेन्द्र खेरेसले गरेका थिए । समयाभावले गर्दा मानिसहरु यथेष्ट आई नपुगेका भएकोले कार्यक्रम केही ढिलो सञ्चालन गरिएको थियो । सृजनशील साहित्य समाजले भर्खरै प्रकाशन शुरु गरेको अर्ध वार्षिक पत्रिका सिर्जनशील साहित्यको अँग्रेजी भाषातर्फका काठमाण्डौस्थित सम्पादक इडिपस अर्थात् कूलदीप सुनुवारको असामयिक दुःखद मृत्युको शोकमा एक मिनेटको मौन धारण गरिएको थियो । समाजका अर्का सदस्य अशोक राईको स्वागत मन्तव्यपछि अनेसाससँग आवद्ध भएर रोजगारीकै दौरान सात वर्ष साउदी अवरमा बिताई भर्खरै हङकङ आइपुगेका मोती चामलिङले ‘साहित्यकारहरुमा सर्वपक्षीय

सोँच हुनुपर्दछ’ भन्दै हनेसा स्थापित भइसकेको बारे आफ्नो मन्तव्य दिएपछि नेपाल डट यचकेका ‘हनेसा प्रमुख’ प्रदीप कन्दङ्वा तथा हङकङ नेपाली महासँघका ‘साहित्य विभागका सँयोजक’ भोगेन एक्लेले विमोचित उपन्यास ‘आदिवासी’को बारे समालोचनात्मक मन्तव्य दिएका थिए । ‘चौँतीस पेजको भूमिका, छयानब्बे पेजको उपन्यासमा राखिएको अति धेरै भएको’ भन्ने कन्दङ्वा जस्तै, उपन्यासमा प्रस्तुत गरिएको ‘समय, काल तथा परिवेशहरु समयसापेक्ष नभएको’ले आफूलाई खटि्कएको र उपन्यास भयवादमा आधारित भएको भन्ने बारे अझै आफूले नबुझेको समालोचकीय भनाइ राखेका थिए एक्लेले । टँक सम्वाहाम्फे, किसन राई, गणेश इजम, हेजेन राईका आ-आफ्ना, ‘भयवाद’ तथा ‘उपन्यास आदिवासी’ वा ‘उपन्यासकार देश सुब्बा’को बारेको मन्तव्यहरुपछि आफ्नो ‘उपन्यास तथा आफ्नो भयवाद’को बारेमा सानो मन्तव्य दिएका थिए उपन्यासकार देश सुब्बाले भने त्यस कार्यक्रममको ‘विमोचन तथा छलफको समापन’मा सिर्जनशील साहित्य समाजका अध्यक्ष हाङयुग अज्ञातले सिर्जनशीलता, भयवाद, वर्तमान नेपाली साहित्यसहित नेपाली डायस्पोरिक अवस्थासम्वन्धि मन्तव्य दिई उपस्थित अतिथिहरुलाई धन्यवाद दिएर सभा विसर्जन गरेका थिए । सोपश्चात् रात्रिभोज शुरु भएको थियो र अन्त्यमा

अनौपचारिक कविता वाचनको कार्यक्रम रहेको थियो । देश सुब्बा, देबेन्द्र खेरेस, टँक सम्वाहाम्फे, गणेश इजम, हाङयुग अज्ञात, कमल पौडेल, दिनेस सुब्बा आदिले कविताको वाचन गरेका थिए । कार्यक्रम विहानको ०१ बजेसम्म चलेको थियो । कार्यक्रममा पैँतीस जना जत्तिको उपस्थिति रहेको थियो । समाजका साहित्यकारहरुसहित पत्रकारहरु, सनराइजका सम्पादकद्वय भूपेन्द्र चेम्जोङ-नन्द प्रकाश वाक्सिला, नेपाल डट यचकेका आशिष साम्पाङ ‘महेश’ तथा फोटो पत्रकार मातृका राई आदिको उपस्थिति थियो । कार्यक्रममा पहिलो पटक तीन जनालाई सँयुक्त रुपमा प्रमुख अतिथि बनाईएको थियो । सिर्जनशील साहित्य समाजका अध्यक्ष हाङयुग अज्ञातको अध्यक्षतामा सञ्चालित उक्त कार्यक्रममा हङकङ

नेपाली महासँघका अध्यक्ष हेजेन राई, एभरेष्ट साप्ताहिकका सम्पादक किसन राई र यनआरयनका एसिया प्यासिफिक रिजनका क्षेत्रीय प्रतिनिधि गणेश इजम सँयुक्तरुपमा प्रमुख अतिथि रहेका थिए भने, हङकङ नेपाली साहित्य प्रतिष्ठानका अध्यक्ष टँक सम्वाहाम्फे, नेपाल डट यचकेका ‘हनेसा प्रमुख’ प्रदीप कन्दङ्वा, हङकङ नेपाली महासँघका साहित्य विभागका सँयोजक भोगेन एक्ले अन्य अतिथिहरु थिए । देश सुब्बाले केही वर्षअगाडिबाट हङकङमा भयवादबारेमा चर्चा चलिरहेको छ । भौतिक यावत जीवन र जगतमा हरेक वस्तुहरु ‘भय’बाट नै कृयारत रहेका हुन्छन् भन्ने अर्थमा उपन्यासकार देश सुब्बाले र्दुइ वर्षअगाडि नै एउटा भेलामा औपचारिकता निर्वाह गराइसकेका हुन् । मानव सभ्यतामा विकास भएर आज यो अवस्थासम्ममा आइपुग्नुमा मानवीय ‘लोभी’ प्रकृतिको कारण छ, नत्र आज मानव उही ढुङ्गे सभ्यतामा नै हुने थिए भन्ने विश्वव्यापी तर्कका विपरीत देश सुब्बाले आफ्नो भयवादलाई प्रष्ट्याउने प्रयास गरेका छन् । यसै सिलसिलामा उनको यो ‘आदिवासी’ शीर्षकको उपन्यास सिर्जनशील साहित्य समाज हङकङको प्रकाशनमा छापिएको छ । आफ्नो छोटो एकत्रित अवधिमै सिर्जनशील साहित्य समाजले हङकङबाट

विभिन्न पुस्तकहरुको प्रकाशन गरेर, साहित्यिक गतिविधिहरुको आयोजना गरेर हङकङ नेपाली साहित्यलाई फलाउँदै फुलाउँदै लगेको छ । ‘ककपिक’, ‘राइफलको नालबाट जीवन नियाल्दा’, ‘शब्दघोष जिजीविषाको’, ‘हङकङमा कविता’, ‘राइफलले फलाकेको जिन्दगी’, ‘सिर्जनशील साहित्य’ (अर्ध वार्षिक पत्रिका) र ‘आदिवासी’ जस्ता पुस्तकहरु सिर्जनशील साहित्य समाज हङकङले प्रकाशित गरिसकेको छ ।

हङकङमा देवकोटाजयन्ती

2007-11-10T19:01:00.000-08:00

देवराज राई / हङकङ
आफ्नो भाषा, साहित्य र संस्कृतिको सम्वृद्धिले नेपाली समाज बसाऔँ भन्ने अभियोजना सहित हङकङ नेपलीज फाउण्डेशन्को संयोनमा, हङकङ नेपाली साहित्य परिषद् हङकङको आयोजनामा ९ नोभेम्बर २००७ अर्थात लक्ष्मीपूजाको दिन युनलङ टाउन हल हङकङमा विविध कार्यक्रमहरु सहित देवकोटाजयन्ती २००७ भव्यरुपमा मनाइयो ।

हङकङका विभिन्न सरकारी तथा गैरसरकारी विद्यालयहरुमा अध्ययनरत नेपाली विधार्थीहरु, शिक्षक, अभिभावकहरुको सहभागितामा सम्पन्न भएको कार्यक्रममा नेपाली विधार्थीहरुले देवकोटाको चर्चित खण्डकाव्य मुनामदनको आंशिक भागहरुलाई श्रृङ्खलावद्ध मञ्चन गरेका थिए । सो नाटकको निर्देशन टिके प्रथामिक विद्यालयका शिक्षक आमोद र्राईले गर्नु भएको थियो । देवकोटाजयन्तीमा पहिलो पटक देवकोटाले अन्य भाषामा लेख्नु भएको जर्मनी, हिन्दी, नेवारी, अंग्रेजी, बंगला भाषाका कविताहरु समेत सम्बन्धित भाषा बोल्ने शिक्षक तथा नेपाली विधार्थीहरुले वाचन गरी देवकोटा प्रति श्रद्धाञ्जलि अर्पण गरिएका थियो ।

कवि, सहित्यकार, संगीतकार, गायक कलाकार, विद्यालयका प्रधानअध्यापक, शिक्षक, पत्रकारहरु तथा विधार्थीहरु र तिनका अभिभावकहरुको उपस्थितिमा अधिकांश विधार्थीहरुले देवकाटाको स्मरणमा देवकाटाप्रति र्समपित आफ्ना सिर्जनाहरु प्रस्तुत गरका थिए । विविध सांस्कृतिक कार्यक्रम सहित सम्पन्न भएको कार्यक्रममा विधार्थीहरुले सामुहिक नृत्यहरु समेत प्रस्तुत गरेका थिए । देवकोटाजयन्ती २००७ लाई एचकेनेपाल डटकमबाट प्रत्यक्ष प्रशारण गरिएको थियो । हङकङ नेपाली साहित्य परिषद्का अध्यक्ष एकराज र्राईले भाषा, साहित्य र संस्कृतिले समाज उठान सन्दर्भमा हङकङ र देवकाटाजयन्ती विषयमा सम्बोधन गरेपछि शुभारम्भ भएको कार्यक्रममा एभरेष्ट साप्ताहिकका सम्पादक

किसन र्राई, सगरमाथा किण्डरगार्टेनकी प्रिन्सिपल कमला राइले समेत सम्बोधन गर्नु भएको थियो । वरिष्ठ संगीतकार दिनेश सुब्बाले देवकोटा प्रति श्रद्धाञ्जलि अर्पण गर्दै 'कुनमन्दिरमा जान्छौ यात्री' भन्ने गीत प्रस्तुत गर्नु भएको थियो । हङकङ नेपाली गायक कलाकारहरुमा जेष्ठ गायक व्यक्तित्व वीरवहादुर थापाले, कन्दरा व्यण्डका संस्थापक विजय गुरुङ सहयोगमा देवकोटाले रचना गर्नु भएको मुनामदनको एक सानो अंशलाई प्रस्तुत गर्नु भएको थियो । हङकङ नेपाली महासंघका अध्यक्ष तथा कवि नारायण रतञ्छालीले बालबालिकालाई सम्बोधन गरेको एक कविता सुनाउनु भएको थियो । पीके माध्यमिक विद्यालय पीएच केन्द्रीय प्राथमिक विद्यालय, टिके प्राथमिक विद्यालय, उमा प्राथमिक विद्यालय, सर कादुरी प्राथमिक विद्यालय, डेलिया उच्चतर माध्यमिक विद्यालय, सर कादुरी माध्यमिक विद्यालय, सगरमाथा किन्डरगार्टन विधार्थीहरुको विशेष सहभागिता रहेको कार्यक्रममा नेपाली तथा अन्य मुलका विधार्थीहरुले नेपाली नृत्यहरु प्रस्तुत गरेका थिए । अमेरिकन नागरिक तथा शिक्षक केनी याकिनले देवकोटाले लेख्नु भएको अंग्रेजी कविता, पाकिस्तानी विधार्थी मिस सानियाले उर्दू कविता वाचन गरी देवकोटाका सम्मान व्यक्त गर्नु भएको थियो । अन्यभाषाका कविताहरु भने नेपाली विधार्थीहरुले नै प्रस्तुत गरेका थिए । कार्यक्रम बेलुकी ७ बजेदेखि ९ बजेसम्म सम्पन्न भएको थियो । कार्यक्रममा आमोद राइ,बिमल गुरुङ,देवराज राइ,दिपक गुरुङ,प्रमिला पुन, एकराज राइ लगायतका व्यक्तिहरुले आफ्ना सीपहरु खर्चिएका थिए ।

फोटो अम्वु गुरुङ्ग

सृसास हङकङद्वारा पत्रिका विमोचन तथा कविता गोष्ठि सम्पन्न

2007-10-17T20:09:00.000-07:00

२००७ अक्टोवर १७ तारिख बुधवार को अपरान्ह हंगकंग स्थित चुनमुन क्याफे समुद्रको वालुवा माथि उभेर हङकङ रहनु हुने पत्रकार कवि लेखक तथा वुद्घीजीवीहरुको वाहुलीवाट सृजनशील साहित्य समाज हङकङद्वारा अर्धबाषिर्क रुपमा प्रकाशित साहित्यिक पत्रिका सृजनशील साहित्य नामक पत्रिकाको सामुहिक र अत्यान्तै नौलो ढंगबाट विमोचन गरीयो । उक्त कार्यक्रमको अध्यक्षता नेपाली प्रतिष्ठान हङकङका सदस्य तथा भयवादका प्रवर्तक उपन्यासकार देश सुब्बाले गर्नुभएको थियो भने प्रमुख अतिथी नेपाली महासंघ हङकङका अध्यक्ष हेजेन राई साथै विशेष अतिथीहरुमा नेपाली प्रतिष्ठान हङकङका अध्यक्ष टंक सम्वाहाम्फे जनजाति महासंघ हङकङका अध्यक्ष भूपेन्द्र चेम्जोङ्ग गायक तथा संगीतकार नागेन्द्र श्रेष्ठ हुनुहुन्थ्यो भने अतिथीहरुमा कथाकार प्रदिप कन्दङवा कथाकार प्रकाशकृष्ण वाक्सिला कवि आषीस लिम्वु कथा तथा गीतकार हिमकला राई कवियत्री आशा राई विदिर्ण हुनुहुन्थ्यो । सृजनशील साहित्य समाज हङकङका अध्यक्ष तथा सृजनशील अराजक समुहका सदस्य कवि हांयुग अज्ञात सोहि समाजका सचिव कवि नरेश सुनुवारले कार्यक्रमको व्यवस्थापन गर्नु भएको थियो भने सो कार्यक्रम कवि खेरेश देवेन्द्रले सञ्चालन गर्नु भएको थियो । विमोचन कार्यक्रम पाश्चात विविक्यु स्पटमा वसेर चियापान र मासु खादै त्यहा उपस्थित कवि कवियत्री व्दारा कविता वाचन गरीएको थियो । सृजनशील साहित्य समाज हङकङका अध्यक्ष तथा सृजनशील अराजक समुहका सदस्य कवि हांयुग अज्ञातले आगमी दिनहरुमा पनि निरन्तर अर्धबाषिर्क रुपमा सृजनशील साहित्य पत्रिका प्रकाशन गर्दै लैजाने योजना रहेको कुरा बताउनु भयो । सृजनशील साहित्य पत्रिका तिन खण्डमा विभाजीत गरी प्रकाशित गरीएको छ । पहिलो खण्डमा नेपालका कवि साहित्यकार तथा समालोचकका उत्कृष्ठ रचनाहरु छन् भने दोस्रो खण्ड हङकङमा क्रियाशील रहनु हुने साहित्यकारहरु रचना रहेकाछन् । तेस्रो खण्ड अंग्रेजीमा लेखीएका र अनुवाद गरीएका विभिन्न नेपाली साहित्यकारका रचनाहरु समेटिएकाछन् ।

-----------------------------------------------------------------------------------------------------------
-----------------अतिथीहरु व्दारा विमोचन गरीएको झलक

-----------------------------------------------------------------------------------------------------------

सृजनशील साहित्य पत्रिका विमोचन गर्दै वायावाट क्रमश हङकङका वुध्दिजीवी

पत्रकार गायक र साहित्यकारहरु नरेश सुनुवार,हिमकला राई, आशा राई 'विदिर्ण'

आषीस लिम्वु टंक सम्वाहाम्फे, हेजेन राई, खेरेश देवेन्द्र, देश सुब्बा, भूपेन्द्र चेम्जोङ्ग,

प्रकाशकृष्ण वाक्सिला,हांयुग अज्ञात, प्रदिप कन्दङवा, नागेन्द्र श्रेष्ठ

विमोचीत सृजनशील साहित्य पत्रिकाको आवरण पृष्ठ